前一晚艇家來料話有大量雞魚，於是 “拿拿聲” 約埋肥佬祥、珠記去碰下運氣。當日天氣時陰時晴，風只得兩級，幾舒服架 !! 一大清早o係青龍頭落艇，直畢飛去蚊洲；魚餌只有一種，就係南極蝦，球哥一試馬上有料到，約十幾兩雞魚，珠記一樣，不過大少少，祥哥連中幾口都係雞，又係十幾兩左右，艇家亦然。玩左一輪都係獨沽一味，不過密口程度出乎意料，簡直係放落去就有呀 !! 估計下面正集結一大群雞魚，所以釣極都有，但較細既魚係會落番落海既。
飯後幾位繼續努力，終於唔係雞啦 !! 珠記玩左一輪，點解仲未上水… ?! 糾纏過後原來珠記中左條好少見既白鬚公，有成 11 斤架，珠記話過足癮呀 !!! 球哥、祥哥繼續雞魚無停手，轉眼間珠記又再次加入雞魚陣型啦 !! 艇家話已釣過 200 條雞魚，三人戰意旺盛，再攻一輪，雞魚數目已超過 300。突然間珠記大叫呢條唔係雞黎架 !!
5 分鐘過後仍在搏鬥當中，再過幾分鐘先慢慢見到個影，銀光閃閃既，見到啦 !! 又係好少見既魚，一條好閃既倒甲池，約 4 斤。
球哥、祥哥依然無停手，雞魚數目不停上升，直至 16：00 左右，三位示意艇家回程；阿頭得知魚獲甚多馬上開車趕往碼頭幫手，合四人之力順利將魚獲搬上貨 van ，到達魚會時各會友分工合作，先過磅，接著打鱗，繼而劏魚；由於數量太多，花費兩個鐘才完全，經粗糙點算後雞魚超過 400 條，總重量約兩擔。揀好晚飯用魚獲後，總廚芬哥隨即炮製一餐美味既晚餐。
詳細資料及圖片：
http://hk.myblog.yahoo.com/fialai/article?new=1&mid=1479 |
發表於 2009-4-14 06:06 PM
| 
