單打獨鬥賽績優秀！長期二奶馬K.O.兩連勝當起分子
跑完頭六場，騎師王由蔣嘉琦及雷神分據一、二位，彼此爭持激烈。去到第七場四班一哩，雷神對霍利時馬房「怡德」鍥而不捨，結果俾佢成功為呢匹著名二奶馬開齋，單Win及組合獨贏A2分別派44及29元正。雷神個人則增添12分，在騎師王壓過蔣嘉琦進佔榜首。
怡和集團擁有的「怡德」近四仗清一色第二，今次係雷神連續第三次策騎，堂堂神級騎師唔可以再失威，人馬合作沿途頂住外側主要對手柏寶之「勝利仔」跑，令對方被迫轉最後一個彎走大外叠，跑多咗好多腳程。拉士由上述兩駒埋身肉搏，「怡德」以較佳餘勢短馬頭位壓住「勝利仔」先過終點，第25次出賽卒之開齋。
閘前落飛變次熱的「勝利仔」最後幾步唔夠鬥僅跑第二，三連捷落空，今場頭二馬單打獨鬥，第三名雷景勳之「勁勇威龍」已輸4馬位之多；第四名係冷馬由蔣嘉琦操刀的「魅力好漢」，四重彩派一萬五千幾，三T冇人中正獎，安慰獎中頭關已可收八萬二千幾。
霍利時指「怡德」狀態一直保持大勇，可惜馬兒今季5次飲恨得第二名，非常欠運，霍利時謂此駒性格忠心但難出頭，今仗全靠雷神騎得硬淨，才有突破。 |
發表於 2016-7-7 01:37 AM
| 
