【子健講馬】幸運波縮程貪對手弱

02754566

尚餘兩次賽事，操練有異動馬不多，少跳、唔跳比比皆是，常強調人有慣性，無目的不會改變，肯變定有想法；賀賢周三晚五匹正選馬，「幸運波」、「勝利仔」及「順勢寶」，來到此刻仍有辣工夫，大抵不必懷疑心意。
第一場五班1200米：「幸運波」今季曾在五班一哩入Ｑ，近兩次也報相同路程，今回明明有五班一哩賽程（第二場），賀賢反其道而行，手執優先出賽權，只要肯報，定會列正選有得跑，偏偏揀1200米，並有除頭罩、加眼罩變動。
看賽前如此積極操練，又未交代，突然有此變動，點會係陪跑等下季？首先一定知，跑1200米對手大幅減弱，怕唔夠速度，加眼罩幫一幫，好正路；賀賢也不會不知，四月中曾在四班同程無眼罩下跑第五，大抵說明為何會報今場1200米！有硬淨郭能，有眼罩，排三檔，對住一批跑到殘晒的短途馬，贏馬好正常！
「鴻圖戰士」季內曾贏四班田草1200米，其後表現反覆，近仗更差到離譜，求減分才如此，抑或真的回落，都有可能；不過，今次跑五班，有埋莫雷拉，買Ｑ仍會預佢。「飛霞」一檔幫到手，也是合理配腳。「智能」前仗有拖，上仗無要，主要是排檔條件轉變，深明實力有限，無檔便蝕唔起，今次抽二檔，有埋蔣嘉琦減磅，又會預番。
「日月光華」間中追近，然而至今連Ｑ都未入過。「高山威龍」1200米威力遠不及1000。「祥勝駿駒」六月中還曾停課。「永恆光輝」未及水準，且非短途馬。「盈喜悅」、「金鎗俠」外檔難跑。「一定旺」好沉，縱使最後試跑拍跳也唔信。