對手食塵！嘉琦戰馬晒實力 湯仔告別快活谷有第二

02754566

實力飛駒

蔣嘉琦(右三)在告東尼獎領先梁家俊3場


女騎師蔣嘉琦有幾努力，大家有目共睹。這晚係佢首次參加谷草煞科戰，結果拼至第六場三班1000米，嘉琦BB終於響勝鼓，策騎專登搵佢減七磅靠放制勝的「實力飛駒」，由開閘到衝線都係最快，單Win及組合獨贏A1，分別派27及19.5元。
蘇保羅馬房的「實力飛駒」上次配潘頓在四班谷草1000米不敵楊明綸之「炸魚薯條」屈居亞軍，這對馬今場再碰頭，「實力飛駒」換上蔣嘉琦，「炸魚薯條」易配湯智傑，結果「實力飛駒」反勝「炸魚薯條」，一放絕塵大勝兩個半馬位，連續兩場第二後重新贏馬，拎到今季第二捷，累積5戰2冠2亞，同「炸魚薯條」炮製出翻版Q，後駒騎師湯智傑策騎生涯最後一次跑谷草有第二，表現算有交代。
蔣嘉琦這晚跑完第六場為止，騎五駒獲一冠一亞一季兩殿，打破自己之前兩個賽日不勝悶局，季內累積35場頭馬，在告東尼獎領先師兄梁家俊3場，非常佔優。
今場第三名由吳嘉晉座騎「美麗之友」拎到，第四名至係雷神座騎「花紅」，四重彩派五萬六千幾。